Biografía
Va nacer a Fonz en 1969. Va estudiar Ciencias Fisicas a la Universidat de Zaragoza. Dende entonces treballa de profesor d’Educación Secundaria. La suya pasión per escrebir le viene de choven, dimpués de conocer la obra de los autors cllasicos baixorribagorzanos. S’ha decantau per la poesía y el rellato curto. En las dos modalidaz ha ganau bell premio en concursos literarios como el de Lo Grau, el Cleto Torrodellas u el Condau de Ribagorza. Ha publlicau en revistas, periodicos y llibrez de fiestas. Algunos de los suyos escritos han siu representaus en recitals poeticos u en conciertos de mosica en llengua aragonesa. Parte de la suya obra está repllegada n’el llibro Be regulá. En lo tocante a la llengua castellana, tiene publlicau el llibro de poemas La arena y el mar, y partecipa a’l poemario colectivo Poetas bajo las estrellas. Con la novela Díxame pescá con tú va ganar el X Premio de Nobela Curta Ziudá de Balbastro 2018. Va estar traducida a’l castellano con el tetulo Llévame a pescar contigo (2020) y publlicada en esta mesma editorial. En 2022 va publlicar el llibro La casa los Telaires y atros rellatos. @chuandefonz
Libro
Sobre tot no tomar mal. Historias sin solta ni volta
Querir cllasificar las historias repllegadas a este llibro é pordemás. Encomenza con unas entrevistas radiofonicas que se van retransmitir, dende una bodega y en rigoroso indirecto, a la emisora Hit Radio Lo Grau. Dir que i son surrealistas é quedar-mos curtos. Dimpués d’este pllanteamiento, se despllega un nyudo d’historias a cual más estrafalaria u redicula. Entre los protagonistas n’hai pocasustancias, simplles d’espritu u d’estes que se crein que el saben tot. Dende el que no para cuenta de per án s’ha chirau l’aire y acaba entrampau a’l que no adube a desembolicar-se en situacions habituals y dixa pelo per la gatera. Más de la metat d’estes enredos s’han iu publlicand mes per mes a la revista Ronda Somontano. Pa rematar, unatra entrevista, esta vez de televisión, mos dixará a las cllaras quí é normal y quí no lo’n é. Si ben la ironía, la satira y la parodia s’entremezcllan con la intinción de fer redir, qui sepa desencapar la primer crosta verá fllorecer, amagada entre la comedia, una sotil cretica social. A la fin, historias sin solta ni volta con una alvertencia escllatera: sobre tot no tomar mal.